స్కూల్ లైబ్రరీలో రష్యన్ మరియు బెంగాలీ అనువాదాలు, కుప్రీన్, టాల్‌స్టాయ్, తుర్గనేవ్ రచనలు చదివి, చిన్న వయసులోనే సాహిత్యపు మాధుర్యాన్ని ఆస్వాదించారు. విద్యార్థి దశలోనే పల్లె జీవనంపై “మట్టిపాట” పేరుతో ఒక శతకం రచించారు. అది వారి  సాహిత్య పయనం మొదటి అడుగు. 

పదవ తరగతిలో ఉన్నప్పుడు బాలల మాసపత్రిక నిర్వహించిన నవల పోటీలో 120 పేజీల “ఊరు మారింది” అనే నవల రాసి పంపారు. తర్వాత “సినీయాక్టర్‌ని” అనే నవలతో తన సృజనాత్మక ప్రతిభను మరింతగా చూపించారు. 1983లో “పాఠశాల” అనే విద్యార్థి పత్రికకు శ్రీనాథ మహాకవిపై రాసిన వ్యాసానికి మొదటి బహుమతి లభించింది. ఆటలు, వ్యాసరచన, వక్తృత్వ పోటీలలో చురుకుగా పాల్గొంటూ తొమ్మిదో తరగతిలో విద్యార్థి సంఘ కార్యదర్శిగా, పదో తరగతిలో అధ్యక్షుడిగా ఎన్నికయ్యారు.

ఇంటర్ చదువుతున్న సమయంలో యువవాణి కార్యక్రమంలో కవిత్వం చదవడానికి అవకాశం పొందారు. తిరుమల తిరుపతి దేవస్థానం నిర్వహించిన పురాణ ప్రబోధ పరీక్షలో జిల్లా ఫస్ట్ ర్యాంకుతో రజత పతకం అందుకున్నారు. డిగ్రీ రెండవ సంవత్సరం చదువుతున్నప్పుడు రచించిన “పగిలిన గుండెలు” నవల, ప్రజాపోరాటం సాయంకాల దినపత్రికలో రెండున్నర నెలలపాటు డైలీ సీరియల్‌గా ప్రచురించబడింది. ఈ సాహిత్య యాత్రలో, కవి, రచయిత, విమర్శకుడిగా ఆయన సాధించిన స్థానం తెలంగాణ సాహిత్య ప్రపంచానికి ఒక గర్వకారణం.

తెలంగాణ రుబాయిలు, హైదరాబాద్ విషాదం, కొత్త పలక అనే విభిన్నమైన సాహిత్య సృజనలతో ఏనుగు నరసింహారెడ్డి తెలంగాణ సాహిత్యం పై తనదైన విశేషముద్రవేశాడు. కవిగా వచన కవిత్వాన్ని రుబాయిలను, చందోబద్ధ పద్యాలను సాధికారికంగా రాయగలిగిన అరుదైన తెలుగు కవులలో ఏనుగు నరసింహారెడ్డి ఒకడు. ఆయన రాసిన మట్టి పాట శతకం పల్లె జీవిత దైన్యాన్ని కళ్ళకు కట్టడంతో దేశపతి శ్రీనివాస్ స్వరంలో దీర్ఘ గేయంగా వచ్చింది. ఏనుగు నరసింహారెడ్డి రాసిన తెలంగాణ రుబాయిలను అనేక మంది ఔత్సాహిక గాయకులు తమదైన స్వరంలో పాడి వీడియోలు అద్ది యూట్యూబ్లో పదిలపరుచుకున్నారు. చిన్న కవితల సంపుటిగా తీసుకువచ్చిన పూల పూల వాన ను తెలుగు సమాజం ఎంతగానో ఆదరించింది.